sham-e-firaq subh-e-darakhshan hai aaj-kal
har ashk jaise nayyar-e-taban hai aaj-kal

yarab mata-e-dard mohabbat ki khair ho
phir chashm-e-naz silsila-jumban hai aaj-kal

allah-re jazb-e-ishq ki pindar-e-husn-e-dost
majruh-e-iltifat-e-gurezan hai aaj-kal

barpa hai chashm-e-naz mein phir hashr-e-iltifat
sach-much jafa pe koi pasheman hai aaj-kal

lau de uthe hain dida-o-dil fart-e-shauq se
mehrab-e-zindagi mein charaghan hai aaj-kal