sham se hum ta sahar chalte rahe
chur the thak kar magar chalte rahe

sang ho jate jo mud kar dekhte
ungliyan kanon mein dhar chalte rahe

aasman tha aag patthar thi zamin
thi kahan ja-e-mafar chalte rahe

roz dube roz ubhre hum magar
surat-e-shams o qamar chalte rahe

sang-bari yun to hum par bhi hui
hum dhake hathon se sar chalte rahe

dar badar ki khak thi taqdir mein
hum liye kandhon pe ghar chalte rahe

hum bhi hain 'bilqis' majruhin mein
hum pe bhi tir o tabar chalte rahe