sham se zoron pe tufan hai bahut
us ke laut aane ka imkan hai bahut

aaegi nur-e-mujassam ban kar
surat-e-saya gurezan hai bahut

kuchh bhi hon mauj o hawa ke tewar
jism parwarda-e-tufan hai bahut

shayad aa pahunche hain wo asp-sawar
shahr ka shahr hirasan hai bahut

jism o jaan warta-e-zulmat hi sahi
paikar-e-harf darakhshan hai bahut

zer-e-farman rahe iqlim-e-sukhan
rahne ko gosha-e-viran hai bahut