sher-goi to ek bahana hai
e'tibar-e-sukhan badhana hai

jis se hon fikr ke dariche wa
aisa mahaul ab banana hai

ho khudi se agar shanasai
thokaron mein teri zamana hai

kal zamane ne aazmaya tha
ab zamane ko aazmana hai

us gali ki kashish nahin jati
yun to har roz aana-jaana hai

gar tabiat teri nahin mail
phir takallum bhi taziyana hai

ji raha hun kisi musafir sa
sirf uqba mera thikana hai

jab mazamin-e-nau chale aaen
shaeri ko surur aana hai

naqd ho sher ho ki fan-para
apna andaz nasihana hai