sher-o-sukhan ka ye guldasta tere nam
khun-e-jigar ka ye nazrana tere nam

manzil manzil dhup ki chadar phaili si
yaadon ka ye thanda saya tere nam

mausam-e-gul ka kaif mahakti sabz faza
meri bahaaron ka ye tohfa tere nam

dil ke ik-tare par jis ko gaya tha
wo pur-soz adhura naghma tere nam

tere sath jo lamhe guzre khwab hue
mazi ka har khwab sunahra tere nam

duniya ke pur-shor samundar mein likh dun
khamoshi ka ek jazira tere nam

lafzon ke zahrab mein dubi kuchh yaaden
ye 'tamkin' ka kul sarmaya tere nam