shikasta saz-e-mohabbat ki ek sada hun main
jo rah gai hai laraz kar wo iltija hun main

dam-e-nazara ye diwangi-e-zauq-e-nigah
wo mujh ko dhundte hain un ko dhundhta hun main

jahan ye kufr hai taqdir ka gila karna
ab is maqam pe apne ko pa raha hun main

salam ai nigah-e-be-niyaz-e-garmi-e-ishq
khata muaf ki ab sard ho raha hun main

mera hi zarf hai is mai-kada mein ai saqi
ki jam-e-talkh bhi hans hans ke pi raha hun main

meri talash mein rahti hai khud meri manzil
ghalat khayal ki manzil ko dhundhta hun main

wahin se pai hai manzil ki rah ai 'asi'
jahan pe us ki mohabbat mein kho gaya hun main