sirf ummid par tiki mitti
kuchh nae khwab dekhti mitti

ud lo jitna yahin pe aaoge
kah rahi hai zamin ki mitti

raund lo kitna ye haqiqat hai
ek din sab ko raundegi mitti

main ne dekha hai aisa bhi manzar
mitti mitti mein mil gai mitti

pyar jis ko nahin mila samjho
ho gai us ki zindagi mitti

aaina kaise saf dikhlata
us ke chehre pe thi sani mitti

ek nai zindagi ki chahat mein
chaak par ghumti rahi miti