siskiyan leti rahi thi raat bhar
shama ek aisi jali thi raat bhar

har taraf tha kaif-o-masti ka saman
har taraf chhai khushi thi raat bhar

hijr mein koi sharik-e-gham na tha
sham-e-dil tanha jali thi raat bhar

sar uthae the andhere ke hujum
raushni sahmi hui thi raat bhar

dekh kar ranaiyan chaaron taraf
aankh meri kab lagi thi raat bhar

kis qadar maghmum thi bazm-e-sharab
dil ko kaisi bekali thi raat bhar

'ashna' chashm-e-tasawwur ke nisar
un ki hi jalwagari thi raat bhar