sulag uthe mere mausam ye kya kiya tu ne
gulon pe jal gai shabnam ye kya kiya tu ne

zamin nahin hai faqat sogwar is gham ki
falak pe chha gaya matam ye kya kiya tu ne

nayan to sukh gae dard ki tapish pa kar
nazar se risne laga gham ye kya kiya tu ne

raha na yaad tere baad koi is dil ko
ki sab ko bhul gae hum ye kya kiya tu ne

ghata raha tha tujhe apni zat se lekin
main khud bhi hone laga kam ye kya kiya tu ne

phir is ke baad kabhi aaine ke aage bhi
nazar utha sake na hum ye kya kiya tu ne

wo shakhs chahta tha umr bhar rahe mujh mein
jo mujh mein tod gaya dam ye kya kiya tu ne

meri hayat meri zat meri ummiden
sisakti rahti hain paiham ye kya kiya tu ne