sun kar main jurm chup tha gunahgar ki tarah
luknat zaban mein aa gai mai-khwar ki tarah

wo kaisi subh thi ki tulu-e-sahar ke baad
suraj ka chehra lagta tha bimar ki tarah

han us ki dastan bahut dil-kharash thi
khamosh tha jo saya-e-diwar ki tarah

rukne ka nam bhi nahin lete the wo kabhi
ahl-e-junun the waqt ki raftar ki tarah

maqtal se tegh dar-o-rasan se salib se
mujh ko hai pyar kucha-e-dildar ki tarah

hum tira-bakht aap hi kahiye kahan se laen
shaukat jalal shan wo sarkar ki tarah

upar se dekhne mein hain manind-e-koh hum
andar se ek ret ki diwar ki tarah

ai rabb-e-zul-jalal aman paun to kahun
ye umr kat gai kisi nadar ki tarah