surat utar na jae kahin mahtab ki
kah do ki baat jhut hai un ke shabab ki

sham-e-visal sej pe sharmae jun dulhan
sharmai yun hain shakh pe kaliyan gulab ki

patthar uchhaal dijiye yun dil ki jhil mein
warna umid rakhiye na mujh se jawab ki

manzil qarib aai to bhatka diya gaya
in rahbaron ne zindagi meri kharab ki

haalat ne bigad di 'wahid' ki shakl yun
jaise kharab jild ho achchhi kitab ki