ta-qayamat nahin zawal hamein
us ne bakhsha hai wo kamal hamein

hum ki raushan kitab wale hain
puchhiye koi bhi sawal hamein

gardish-e-waqt apne kal ki soch
is qadar kar na paemal hamein

hum tere ahd ki amanat hain
apne sine mein rakh sambhaal hamein

ek be-rang kitab ki surat
mez par yun na tu uchhaal hamein

chand taron ne aasman se kaha
aamad-e-shams hai sambhaal hamein