tamam bojh kahan khak-dan pe padta hai
kabhi kabhi to qadam aasman pe padta hai

mujhe to ped ki chhanw ne rok rakkha hai
wagarna hath to abr-e-rawan pe padta hai

ye tir yun hi nahin dushmanon talak jate
badan ka sara khichao kaman pe padta hai

tujhe zamin ke bare mein ilm hai to bata
is aasman ka saya kahan pe padta hai

idhar main panw uthata hun aur udhar 'gauhar'
ghubar sa saf-e-sayyargan pe padta hai