tamam phenke gae pattharon pe bhaari tha
wo ek phul akela sabhon pe bhaari tha

na mujh se dil ne bataya na main ne hi jaana
wo kaisa gham tha jo sare ghamon pe bhaari tha

main un ki rah se guzarta na tha magar phir bhi
mera wajud mere dushmanon pe bhaari tha

agarche baitha tha main un ke darmiyan khamosh
mera sukut magar shairon pe bhaari tha

wo jis ka koi na tha dur ek khuda ke siwa
zamin ka bojh na 'farrukh' dilon pe bhaari tha