taqdir-e-ishq aah-o-fughan ke siwa hai kya
farmaiye ki aah-o-fughan narawa hai kya

rangini-e-jahan bhi hai kis darja dil-fareb
aur waqt-e-be-niyaz bhi simab-pa hai kya

ai lutf-e-na-tamam tere lutf ke nisar
juz dard hasrat-e-dil-e-dard-ashna hai kya

mujh se ye kah raha hai ki tauba ki fikr kar
abr-e-siyah mai-kade par chha gaya hai kya

mere jigar ke dagh ki azmat na pochhiye
us ke huzur lala-e-atish-qaba hai kya

daman hai tar-tar kabhi dil hai chaak-chaak
'fitrat' tumhaare dard-e-junun ki dawa hai kya