tera aanchal nahin hota hai
abr baadal nahin hota hai

barishen to bahut hoti hain
dasht jal-thal nahin hota hai

mustaqil hai ye kaisi kami
kuchh mukammal nahin hota hai

zindagi jab talak rahti hai
masala hal nahin hota hai

sirf us ke shajar hote hain
sabr ka phal nahin hota hai

ek jangal nazar aane se
shahr jangal nahin hota hai

us ko tafsil se padhta hun
jo mufassal nahin hota hai

baat karte hain sadiyon ki hum
pas ek pal nahin hota hai