teri rahmat se achanak dur ho jaun na main
ek malik se kahin mazdur ho jaun na main

mere malik ek chhoti si dua kar le qubul
rahmaten pa kar teri maghrur ho jaun na main

jhilmilata sa diya hun khauf hai dil mein to bas
dekhte hi dekhte be-nur ho jaun na main

is qadar tu imtihan-e-sabr mat le ab mera
dar se uthne ke liye majbur ho jaun na main

us se milne ki dobara is liye koshish na ki
us ke hathon phir kahin ranjur ho jaun na main

us ne jab parda hataya pher li main ne nigah
is liye ki jal ke koh-e-tur ho jaun na main

aaina mujh ko banaya hai to rakh mahfuz bhi
pattharon ki zad mein aakar chur ho jaun na main