thi qahr-e-sadgi bhi sanwarne se peshtar
shah-rag pe neshtar tha utarne se peshtar

phirta hun dar-ba-dar main magar misl-e-bu-e-gul
mera bhi tha maqam bikharne se peshtar

be-ashk kya hua ki main be-aks ho gaya
aaina tha ye pani utarne se peshtar

hijrat se pahle hijr ke the waswase mujhe
har lamha hadisa tha guzarne se peshtar

is naz-e-intizar ko ek umr ho chali
kaisi hameshgi hai ye marne se peshtar