tu aur sachcha pyar karega chal jhuthe dub ke dariya par karega chal jhuthe sapne mere qais-o-ranjha wale hain kahta hai sakar karega chal jhuthe aankhen jhut ka sauda karti phirti hain sach ka karobar karega chal jhuthe jism se aage ishq dikhai deta hai ruh ka tu didar karega chal jhuthe us ki aankhen us ka chehra us ke lab sab se tu inkar karega chal jhuthe jis gulshan ke kante tak murjhae hain us ko kya gulzar karega chal jhuthe har ek bazi ek rani ka wada hai jit ko apni haar karega chal jhuthe kashti bahki sahil ke tufanon se bahon ko patwar karega chal jhuthe ulfat uljhan aansu nale dushwari jina tu dushwar karega chal jhuthe