tujhe apna banana chahta hun
main qismat aazmana chahta hun

tujhe dil mein bithana chahta hun
nai duniya basana chahta hun

gham-e-dauran se gar mil jae fursat
main hansna muskurana chahta hun

bahut dawa hai tujh ko dosti ka
tujhe bhi aazmana chahta hun

bahut tadpa rahi hain us ki yaaden
main us ko bhul jaana chahta hun

mere rab ki hifazat mein hai kashti
ye tufan ko batana chahta hun

sabaq uns-o-mohabbat ka 'zaki' main
zamane ko padhana chahta hun