tum bhi dekho jo hum ne dekha hai
shahr mein ek naya tamasha hai

raqs karte hue hain log magar
ghunghru patthar ka sab ne bandha hai

sari masrufiyat ki wajh wahi
wahi har khwab ka hawala hai

sab khayalon ka ek mehwar wo
sare lamhon ka wo shanasa hai

us ko dekha to sochta hi raha
khwab ne waqia tarasha hai

mil ke dekha to silsila ye khula
khud hi dariya hai khud hi pyasa hai

zehn mein us ki yaad yun aai
jaise raushan charagh aata hai