tum bin waqt ye kaisa guzra
ashkon ka ek dariya guzra

mera hi ghar bhul gaya tha
baadal qarya qarya guzra

kat gaya tha zist ka dhaara
kahne ko ek lamha guzra

chikh thi dil ki lai mein dhal kar
jaise koi naghma guzra

khun hai jin aankhon se jari
un mein bhi ek sapna guzra

khush rahne ka khak jatan ho
dil par bhaari sadma guzra

roz hi log bichhad jate hain
aah magar ek apna guzra

jaan-e-mahfil tha jo kabhi wo
kaisa tanha tanha guzra