tum se mil kar nihayat hasin ho gai
zindagi dilkash-o-dil-nashin ho gai

chahaton ki masafat ka mat pochhiye
din kahin ho gaya shab kahin ho gai

wo mohabbat ki jis ka yaqin tha bahut
ek lamhe mein wo be-yaqin ho gai

waqt ne wo dikhaya karishma ki bas
han mein tabdil us ki nahin ho gai

rang mausam ne badle ajab taur se
subh ki dhup bhi surmagin ho gai

'shaziya' aastan wo mohabbat ka hai
jis se mansub teri jabin ho gai