tumhaare jate hi har chashm-e-tar ko dekhte hain hai aansuon ka samundar jidhar ko dekhte hain 'faraaz' ho gae rukhsat jahan-e-fani se udas udas sukhan ke safar ko dekhte hain kahan wo ishq-e-jawan ki thahar gain kirnen ruki ruki hui baad-e-sahar ko dekhte hain suna hai 'faiz' se aage nikal gae the 'faraaz' ghazal ke soz-e-darun ke asar ko dekhte hain suna hai us ne ghazal ka badal diya lahja sabhi 'faraaz' ke fikr-o-nazar ko dekhte hain suna hai us ki ghazal aaina thi hasti ka isi liye to hum us aaina-gar ko dekhte hain sajaya us ne hunar se jo apni ghazlon ko suna hai log ab us ke hunar ko dekhte hain kahan 'faraaz' kahan 'azam'-e-shikasta-jaan zara sa chal ke hum us ki dagar ko dekhte hain