tumhaare wasl ka bas intizar baqi hai
main rang rang hun lekin singhaar baqi hai

hawaen tham gain gard-o-ghubar baith gaya
ek apni zat ka bas intishaar baqi hai

tamam umr pilaya hai jis ko apna lahu
us ek phul pe ab tak nikhaar baqi hai

tumhaare nam ki khushbu se rach gai hai faza
sada ki gunj mein paiham pukar baqi hai

jo ghaon bhar gaya us ka nishan hai ab tak
us ek zakhm mein ab bhi bahaar baqi hai

jo raat hijr ki guzri tumhaare pahlu mein
us ek shab ka abhi tak khumar baqi hai

tum ek bhuli hui dastan ho lekin
tumhaari yaad mein ek sogwar baqi hai