tumhein ghamon ka samajhna agar na aaega
to meri aankh mein aansu nazar na aaega

ye zindagi ka musafir ye be-wafa lamha
chala gaya to kabhi laut kar na aaega

banenge unche makanon mein baith kar naqshe
to apne hisse mein mitti ka ghar na aaega

mana rahe hain bahut din se jashn-e-tishna-labi
hamein pata tha ye baadal idhar na aaega

lagegi aag to samt-e-safar na dekhegi
makan shahr mein koi nazar na aaega

'wasim' apne andheron ka khud ilaj karo
koi charagh jalane idhar na aaega