tut kar girti fasilon par hawa ka shor tha
raat bhar shahr-e-badan mein kis bala ka shor tha

dhup nikli to wahi pyasi zamin ke hont the
bastiyon mein dur tak gahri ghata ka shor tha

tair-e-khushbu ke haq mein hijraten wirsa huin
khema-gah-e-gul mein wo baad-e-saba ka shor tha

shahr sara khauf ke gunge qile mein qaid tha
ek khuda-e-waqt ki hakim sada ka shor tha

wo faqat ek shor tha hum par pas-e-maqtal khula
halqa-e-yaran mein jo rasm-e-wafa ka shor tha