tuti hai meri nind magar tum ko is se kya
bajte rahen hawaon se dar tum ko is se kya

tum mauj mauj misl-e-saba ghumte raho
kat jaen meri soch ke par tum ko is se kya

auron ka hath thamo unhen rasta dikhao
main bhul jaun apna hi ghar tum ko is se kya

abr-e-gurez-pa ko barasne se kya gharaz
sipi mein ban na pae guhar tum ko is se kya

le jaen mujh ko mal-e-ghanimat ke sath adu
tum ne to dal di hai sipar tum ko is se kya

tum ne to thak ke dasht mein kheme laga liye
tanha kate kisi ka safar tum ko is se kya