ude hain kucha-e-dilbar mein jaan se guzre
ye jaan kya hai ki donon jahan se guzre

agar wo hosh-ruba sar-basar jo ho mahkum
to hai qasam ki har ek aan man se guzre

basanti posh karun hae re main aankhon se
tu zer-e-chashm agar khun-fishan se guzre

qasam hai tuj ko chhidakwa ke jam hi jawega
jo rang qatra-e-ab-e-chakan se guzre

nahin khabar tujhe naseh ki hum gae kan tak
tere to aql-o-qayas-o-guman se guzre

main ek kashish mein pahunch jaun yar tak apne
jo tir chhut ke jaisa kaman se guzre

jo chhar-chhada ke dil-la-makan kare parwaz
tawaqqo hai ki nawon aasman se guzre

khayal-e-yar ka tausan hai khush-khiram mera
khuda kabhi na kare zer-e-ran se guzre

agar nasib hi ho jae faqr ka mujhe fakhr
to zindagi meri kya izz-o-shan se guzre

sukhan hain halqa-e-misra mein jyun dur-e-shahwar
hai ye rija ki qadar-dan ke kan se guzre

ai 'imtiyaz' tu ho zaer-e-madina haram
to kya surur-o-khushi aan aan se guzre