un dinon hum ne khayalon pe tasarruf kiya tha
shaeri tark nahin ki thi tawaqquf kiya tha

jaane kya tha wo talluq ki juda hote hue
hum bhi pachhtae the us ne bhi tassuf kiya tha

kaisi hasrat se hamein dekh raha tha wo gham
pesh jab hum ne use dil ka taaruf kiya tha

raat yaadon ne kai pahr masafat ke baghair
manzil-e-chashm sajaane ka takalluf kiya tha

ishq ek umr saliqe se chhupaya tha 'nafis'
yani ek umr talak kar-e-tasawwuf kiya tha