un ko kahan hai fikr kisi bhi azab ki
kyon baat kar rahe ho gunah-o-sawab ki

duniya banai us ne kuchh apne hisab ki
taswir khinch dali haqiqat ki khwab ki

tanqid karte karte wo naqqad ban gae
ab aa gai hai bari khud un ke hisab ki

jati hui bahaar ke manzar ko dekh kar
un ko padi hai fikr ab apne shabab ki

aasudgi maze se sulati hai raat bhar
mahrumiyan qabaen banati hain khwab ki

jo log khud-farebi mein rahte hain mubtala
un ki nazar mein qadar kahan aaftab ki

'shamshad' ko haqiqat-e-kirdar ka hai ilm
hajat use kahan hai kisi bhi nisab ki