us chashm-e-ashk-e-bar ki zid raegan to ho
meri fasil-e-sabr ka koi nishan to ho

ye kya ki ek samt hi jati hai zindagi
kuchh karobar-e-shorish-e-sud-o-ziyan to ho

jannat si koi chiz ho gham ka muawza
be-shak sukun yahan na ho lekin wahan to ho

jabran na kuchh milega to israr kijiye
be-dast-o-pa hun chhodiye munh mein zaban to ho

le jaiye badan ko bhi aakhir kahan pe aap
koi zamin to ho kahin ek aasman to ho

aae yaqin kyon hamein jalta tha ek badan
be-shak na aag ho kahin lekin dhuan to ho