use kab se yahi samjha raha hun
tera hi tha main jab tera raha hun

mujhe fursat daboche ja rahi hai
main apne aap se ukta raha hun

koi bhi rokne wala nahin hai
khamoshi se guzarta ja raha hun

meri tishna-labi par hansne wale
guzishta waqt main dariya raha hun

wo ghalati jo kabhi ki hi nahin hai
usi ghalati pe main pachhta raha hun

meri viran aankhen kah rahi hain
yaqinan muddaton tanha raha hun

zamana kaam apna kar raha hai
main apna kaam karta ja raha hun