us ko jitna bhula raha hun main
utna nazdik pa raha hun main

sang to aaj hun main us ke liye
muddaton aaina raha hun main

jo uthate nahin hai phone talak
un ke nakhre utha raha hun main

mujh ko quran padha rahe hain wo
un ko gita padha raha hun main

aur kuchh der mujh se baaten kar
teri baaton mein aa raha hun main

jaane kis ki talash mein 'ujjwal'
muddaton lapata raha hun main