wade mohabbaton ke kuchh aise nibhae hain
hum qatl hone kucha-e-qatil mein aae hain

khushbu tere visal ki phaili hai chaar su
kin kin jaghon pe tu ne thikane banae hain

aansu lahu mein dub gae to khabar hui
tufan dil ne dard ke kya kya uthae hain

teri mohabbaton ke nashe bhi ajib hain
hum hosh mein the phir bhi qadam ladkhadae hain

pakke makan ki wahshaton ko dekh dekh kar
ab hum ne khwahishon ke gharaunde banae hain

ye zindagi kisi ki amanat hai dosto
gin ke batao jitne bhi lamhe ganwae hain

sham-e-ghariban tum ne to dekhi nahin kabhi
bas is khayal se hi tumhein dukh sunae hain