wan agar jaen to le kar jaen kya
munh use hum ja ke ye dikhlaen kya

dil mein hai baqi wahi hirs-e-gunah
phir kiye se apne hum pachhtaen kya

aao len us ko hamin ja kar mana
us ki be-parwaiyon par jaen kya

dil ko masjid se na mandir se hai uns
aise wahshi ko kahin bahlaen kya

jaanta duniya ko hai ek khel tu
khel qudrat ke tujhe dikhlaen kya

umr ki manzil to jun tun kat gai
marhale ab dekhiye pesh aaen kya

dil ko sab baaton ki hai naseh khabar
samjhe samjhae ko bas samjhaen kya

man lije shaikh jo dawa kare
ek buzurg-e-din ko hum jhutlaen kya

ho chuke 'haali' ghazal-khwani ke din
ragni be-waqt ki ab gaen kya