waqt bhi tewar badalta jaega
dil bhi apni chaal chalta jaega

rafta rafta umr dhalti jaegi
aaine ka rukh badalta jaega

jazba-e-isar dil mein ho agar
masalon ka hal nikalta jaega

duriyan bhi qurb banti jaengi
chand mere sath chalta jaega

aap ko milti rahegi raushni
dil hamara yun hi jalta jaega

khun-e-dil apna ba-nam-e-angbin
apne paimane mein dhalta jaega

us pe mashriq mehrban hogi 'wali'
jo bhi gir gir kar sambhalta jaega