wasl ki raat wo tanha hoga
us pe haalat ka pahra hoga

nind kyun tut gai aakhir-e-shab
kaun mere liye tadpa hoga

khushbuen phut ke roi hongi
gul hawaon mein jo bikhra hoga

wadi-e-zehn se uthta hai dhuan
qafila yaadon ka thahra hoga

jaane kis haal se guzri hogi
phul jis shakh pe utra hoga

yaad aaengi hamari ghazlen
zikr jab taza hawa ka hoga

chand ko dekh ke chhat par 'anjum'
saya diwar se nikla hoga