wo aaghaz-e-mohabbat ka zamana
zara si baat banti thi fasana

qafas ko kyun samajh lun aashiyana
abhi to karwaten lega zamana

ye kah kar sabr karte hain sitam par
hamara bhi kabhi hoga zamana

qafas se bhi nikala ja raha hun
kahan le jae dekho aab-o-dana

ghurur itna na kar tir-e-sitam par
ki aksar chuk jata hai nishana

agar bijli ka dar hoga to un ko
bulandi par hai jin ka aashiyana

kahani dard-e-dil ki sun ke puchha
'qamar' sach kah ye kis ka hai fasana