wo charagh-e-jaan ki charagh tha kahin rahguzar mein bujh gaya
main jo ek shoala-nazhad tha hawas-e-qarar mein bujh gaya

mujhe kya khabar thi teri jabin ki wo raushni mere dam se thi
main ajib sada-mizaj tha tere e'tibar mein bujh gaya

mujhe ranj hai ki main mausamon ki tawaqquat se kam raha
meri lau ko jis mein aman mili main usi bahaar mein bujh gaya

wo jo lams meri talab raha wo jhulas gaya meri khoj mein
so main us ki tab na la saka kaf-e-dagh-dar mein bujh gaya

jinhen raushni ka lihaz tha jinhen apne khwab pe naz tha
main unhi ki saf mein jala kiya main usi qatar mein bujh gaya