wo dil mein roz naya dard le ke aata hai
pe titliyon ke taaqub mein bhul jata hai

jo munh chhupa ke dariche se bhag jata hai
dil-o-jigar ka har ek zakhm muskuraata hai

farishte us ki kamai pe naz karte hain
wo faqa-mast pasine mein jab nahata hai

wo jis ki zad se larazte the qaisar-o-kisra
na jaane kaise piyaadon se mat khata hai

wo ek zakhm jo saughat hai mohabbat ki
jigar pe dagh hai jugnu sa jagmagata hai

usi ki aankh mein milta hai lutf jine ka
usi ki aankh mein tairak dub jata hai

kabhi ka tod diya us ne aaina 'shakir'
phir aaj kirchiyan palkon se kyon uthata he