wo gada-garan-e-jalwa sar-e-rahguzar chup the
jinhen tujh se thin umiden wo umid-war chup the

wo qatar-e-gumrahan thi liye mishalen rawan thi
wo jo manzil-ashna the wo pas-e-ghubar chup the

ye ajib saneha tha jise chashm-e-gul ne dekha
ki tuyur-e-dam-dida sar-e-shakh-sar chup the

kise jurat-e-tasalli ki wo baat hi thi aisi
shab-e-intizar chup thi mere gham-gusar chup the

hamein kam milin sazaen ki ziyaada thin khataen
tere sahw kya ginaen tere sharmsar chup the

ye dil-o-nazar figaran yahi thi wo waza-daran
pas-e-ku-e-yar giryan sar-e-ku-e-yar chup the

hui hum pe sang-bari magar apni waza-dari
ki thi 'shaz' jin se yari wahi apne yar chup the