wo hans ke dekhti hoti to us se baat karte
koi ummid bhi hoti to us se baat karte

hum station se bahar aae is afsos ke sath
wo ladki ajnabi hoti to us se baat karte

hamare jam aadhi hausla-afzai kar pae
agar us ne bhi pi hoti to us se baat karte

tawajjoh se bahut sharmati hai aawaz apni
agar wo so rahi hoti to us se baat karte

kisi se baat karna itna mushkil bhi nahin tha
kisi ne baat ki hoti to us se baat karte

ye khamoshi bhi kya hai guftugu ki intiha hai
koi baat an-kahi hoti to us se baat karte