wo jo zakhmon ki numaish karte hain
in pe chaaragar bhi koshish karte hain

bas tumhein pane ki khwahish karte hain
hum junun ki aazmaish karte hain

zindagi mein kul mila kar dekhen to
khwab aur taqdir gardish karte hai

aankh do ek gham mein roti hi nahin
abr yakja ho ke barish karte hain

maula teri khalq ke sab log hi
ishq kab karte hain sazish karte hain

asl mein aksar hi mar jate hain hum
khwab mein ji bhar ke jumbish karte hain

main hansa deta hun tum ko aakhirash
aur tumhaare log koshish karte hain