wo mar dega agar khanjar-e-tabassum se
to gungunaunga kaise ghazal tarannum se

saji hai tere liye kaenat-e-sher-o-sukhan
ghazal ye meri hai mansub jaan-e-man tum se

qaza namaz-e-mohabbat na ho kisi surat
agar wuzu nahin mumkin to padh tayammum se

tu ba-hunar hai ki hai be-hunar mere jaisa
ye raaz-e-basta khulega tere takallum se

shanawari ka hunar hi mujhe nahin aata
bachaun kaise tujhe bahr-e-pur-talatum se

mere liye to mere ghar ka hauz kafi hai
karunga kya bhala logo main bahr-o-qulzum se

yazid-e-waqt ki ninden haram hoti hain
husain ab bhi tere ijtima-e-chehlum se

sitara us ke muqaddar ka jab nahin chamka
utha hai dushmani karne wo bazm-e-anjum se

mere safina-e-hasti ke nakhuda tum ho
ye dagmaga nahin sakta kisi talatum se

kisi ke sath mujhe dekh kar kisi ne kaha
ye bewafai ki ummid to na thi tum se

namaz-e-ishq khuda ki adaegi ke liye
zamin pe aaega koi falak chahaarum se

ye lafz sunte hi mahbub yaad aate hain
jabhi to uns hai is dil ko lafz-e-panjum se

qadam qadam pe jahaalat use sataegi
jo dur ho gaya talim aur tallum se

mujhe hai jaldi mujhe aur kahin bhi jaana hai
kaha ye us ne ki main kal milunga phir tum se

usi samaj ke afrad sang-dil nikle
samaj khali tha jo jazba-e-tarahhum se

khushi se lautna apne watan ko ai 'nuri'
hua jo farigh-e-tahsil hauza-e-qum se