wo nahin hum jo dar hi jawenge
dil mein jo hai so kar hi jawenge

tujh se jis dam juda hue meri jaan
phir ye suniyo ki mar hi jawenge

did phir phir jahan ki kar len
aakhirash to guzar hi jawenge

ji to lagta nahin jahan dil hai
hum bhi ab to udhar hi jawenge

be-khabar jis tarah se aae hain
is tarah be-khabar hi jawenge

tujh ko ghairon se kaam hai to rah
hum bhi ab apne ghar hi jawenge

dil ko likh padh ke dijiyo tu 'hasan'
warna dilbar mukar hi jawenge