wo rabt-e-bahami wo eatibar pyar na tha
jise main yunhi samajh baitha pyar pyar na tha

mahin lafzon ki sargoshiyan thin wo kya thin
wo mujh ko sochna diwana-war pyar na tha

wo gili gili hawa aur dhula dhula mausam
barasna aankhon ka wo zar-zar pyar na tha

tum apni pichhli mohabbat ka gham bhulane lagin
mujhe bhi lagne laga pahla pyar pyar na tha

larazte lab pe jo iqrar tha wo aur tha kuchh
tumhaari aankhon mein tha intizar pyar na tha