wo sang ho ki shajar karb-e-intizar mein hai
kise ye ilm hai kya parda-e-ghubar mein hai

kashan kashan liye jati hai tum ko jis ki kashish
wo saya saya sada bahr-e-be-kanar mein hai

karaunga teri jaan-bakhshi nazr-e-jaan kar ke
mujhe bata to sahi kis ke ikhtiyar mein hai

kahan ka qasd karun kuchh pata to ho malum
suna hai itna kisi ajnabi dayar mein hai

sukut-za hi nahin hai sukhan-taraaz bhi hai
zarur shoala koi sang-e-rahguzar mein hai

ye hai ki sher ka asrar-ashna hai wo
wagarna rakkha kya us mein hai kis shumar mein hai