wo shab kis tirgi mein kho gai hai
palat kar phir na aai jo gai hai

abhi aati hun kah kar wo gai hai
bahana hi bana kar to gai hai

mohabbat soch kar main ne nahin ki
mohabbat aadatan phir ho gai hai

jo kahti hai ki khush hai dur rah kar
wo mera nam sun kar ro gai hai

teri khushbu ka khat mein zikr padh kar
diwani ek titli ho gai hai

shikasta-haal ruswa gham-shanasa
firaq-e-yar ki shab so gai hai

khuda-hafiz ho us ka jo mohabbat
fana hone ki khatir ho gai hai