wo the pahlu mein aur thi chandni raat
hamari zindagi thi bas wahi raat

ajab chashmak-zani thi wasl ki raat
nazar un ki thi aur taron-bhari raat

nigah-e-mast un ki keh rahi hai
kahin hoti rahi saqi-gari raat

abas hai wada-e-farda tumhaara
mariz-e-ishq ki hai aakhiri raat

kisi ne wada-e-farda kiya hai
hamein mar kar basar karni padi raat

'tabassum' se kisi ke ban gai thi
meri khalwat sarapa chandni raat